🚧🏗️ Page Still Under Construction
א חכמות בנתה ביתה; חצבה עמודיה שבעה׃
ב טבחה טבחה מסכה יינה; אף ערכה שלחנה׃
ג שלחה נערתיה תקרא על גפי מרמי קרת׃
ד מי פתי יסר הנה; חסר לב אמרה לו׃
ה לכו לחמו בלחמי; ושתו ביין מסכתי׃
ו עזבו פתאים וחיו; ואשרו בדרך בינה׃
ז יסר לץ לקח לו קלון; ומוכיח לרשע מומו׃
ח אל תוכח לץ פן ישנאך; הוכח לחכם ויאהבך׃
ט תן לחכם ויחכם עוד; הודע לצדיק ויוסף לקח׃
י תחלת חכמה יראת ה׳; ודעת קדשים בינה׃
יא כי בי ירבו ימיך; ויוסיפו לך שנות חיים׃
יב אם חכמת חכמת לך; ולצת לבדך תשא׃
יג אשת כסילות המיה; פתיות ובל ידעה מה׃
יד וישבה לפתח ביתה על כסא מרמי קרת׃
טו לקרא לעברי דרך; המישרים ארחותם׃
טז מי פתי יסר הנה; וחסר לב ואמרה לו׃
יז מים גנובים ימתקו; ולחם סתרים ינעם׃
יח ולא ידע כי רפאים שם; בעמקי שאול קראיה׃
🚧🏗️ Page Still Under Construction